Anita Bitri – Biografia

Në vitin 1971, familja Bitri e la qytetin e Sarandës dhe u transferua në qytetin e Vlorës. Lagjja 3 Racat, pranë Teatrit “Petro Marko”, do të bëhej vatra e bukur e kësaj familjeje në qytetin e Vlorës. Në shtator të vitit 1972, kur Anita ishte 4 vjeç, e regjistruan në Kopshtin Nr. 10 të qytetit të Vlorës. Menjëherë ra në sy një gjallëri e çuditshme e vogëlushes Anita Bitri, etja e saj për të qenë protagoniste në lojërat me shoqet, prirja për të recituar bukur vjershat që mësoheshin në kopsht prej edukatoreve, lëvizjet e saj, si dhe mënyra inteligjente se si komunikonte me mjedisin që e rrethonte. Këto veçanti të saj tërhoqën vëmendjen e të gjithëve. Anita këndonte dhe recitonte pa pushim. Anita ishte një fëmijë ëndërrimtar dhe shumë e apasionuar pas muzikës dhe këngës. Këngëtarja Vaçe Zela ishte idhulli i saj dhe ëndërronte të bëhej si ajo, një këngëtare e famshme. Aq e vërtetë është kjo, sa në një festival të fatosave të organizuar në Vlorë, kërcimtarja e vogël Anita Bitri e Kopshtit Nr. 10 tërhoqi menjëherë vëmendjen e jurisë. Në përfundim të takimit, Anita u shpall kërcimtarja më e mirë e atij festivali. Në vitin 1974 atë e regjistruan të konkurronte në shkollën artistike të qytetit “Naim Frashëri”. Talenti i saj i veçantë për muzikën tërhoqi vëmendjen e profesorit të merituar zotit Robert Papavrami, i cili u mahnit nga veshi i saj muzikor në konkursin që u zhvillua për pranimin e elementëve të reja të kësaj shkolle për instrumentin e violinës. Për të parën herë profesori i madh u ndesh me një talent të tillë të dhuruar nga natyra. Anita, sipas profesorit, ishte një nga rastet e rralla që kishte 99 % talent të dhuruar nga Zoti dhe i duhej vetëm 1 % punë për t’u bërë gjeni në violinë. Intuita e profesorit nuk gaboi. Do të duhej vetëm një vit pune që profesori i madh i violinës dhe Anita të dilnin para spektatorit vlonjat në një duet me violinë, duke mahnitur sallën me interpretimin e tyre virtuoz.

Prej moshës 8–14 vjeç, Anita ishte pjesëmarrëse e rregullt e Festivaleve të Fatosave dhe Pionierëve të rrethit të Vlorës, duke u vlerësuar edhe me çmime nderi. Për t’u përmendur janë këngët e kënduara prej saj “Kukulla ime”, “Agimi dhe Fshesa” etj… Vitet e shkollës fillore dhe 8-vjeçare u karakterizuan nga një pjekuri e lartë artistike në drejtim të violinës, por Anita ishte edhe një nxënëse e shkëlqyer edhe në disiplinat e tjera. Kishte një pasion të veçantë për sportin, veçanërisht i pëlqenin ushtrimet gjimnastikore dhe lojërat e topit me dorë (basketboll dhe volejboll) dhe në këtë fushë shfaqej si një sportiste e talentuar. Në vitet e shkollës së mesme, Anita filloi të studionte fshehurazi dhe të besonte në ekzistencën e Zotit, si dhe t’i bindej verbërisht Atij. Të gjithë habiteshin me bindjet e saj fetare, të ndaluara për atë kohë. Pa asnjë druajtje shprehej që dhuntitë e saj ishin dhuratë e Zotit dhe çdo gjë e shikonte në këndvështrimin e tij. Në shkollën e mesme të muzikës “Naim Frashëri” në Vlorë ku ajo vazhdoi studimet, karakterizohej si një nxënëse shembullore dhe serioze në mësime, veçanërisht në violinë, që ishte edhe instrumenti për të cilën studionte. Pasioni i fëmijërisë, kënga, ia kishte lënë vendin violinës dhe solfexhit. Në vitet 1980-1984 prezantohet para publikut vlonjat si violiniste në orkestrinën e shkollës së muzikës “Naim Frashëri”, mirëpo duke u rritur pasioni për këngën po e thërriste, gjë të cilën Anita filloi ta demonstronte te shokët e klasës dhe profesorët e kantos. Të gjithë kuptuan se përveçse një violiniste e talentuar, ajo zotëronte edhe një zë të jashtëzakonshëm. “Një zë i ëmbël e njëkohësisht i rrallë”, e cilësuan profesorët e saj.

Prezantimi i Anitës si këngëtare, erdhi si një fryt i ëndrrave të saj për t’u bërë një këngëtare e famshme si idhulli i saj, Vaçe Zela. Këngët e Vaçes së famshme i këndonte me pasion, qëkur ishte fëmijë. Në vitin 1984. Festivali i Pestë i Këngës së Qytetit të Vlorës që u zhvillua në Pallatin e Kulturës "Labëria" Vlorë, ku Anita merrte pjesë si violiniste, shoqëruese e orkestrinës së shkollës së muzikës “Naim Frashëri” dhe shoqëronte disa nga këngët e këtij koncerti. Por një nga këngëtaret u sëmur dhe kështu, lindi domosdoshmëria të zëvendësohej. Shokët e orkestrës, dhe drejtuesi i orkestrës që e kishin dëgjuar Anitën të këndonte, propozuan atë dhe efekti ishte i mahnitshëm. Prezantimi i parë u prit me duartrokitje pafund nga publiku i sallës, i elektrizuar nga zëri i mahnitshëm i saj. Po kumbonte në sallë një nga zërat më të bukur që ka pasur Vlora, por edhe Shqipëria. Ky ishte fillimi i një karriere të gjatë dhe të suksesshme artistike, që ka vetëm një protagoniste: Të madhen dhe të paharruarën ANITA BITRI. Po atë vit, Anita do të korrte një tjetër sukses të rëndësishëm, në një koncert në Kinoteatrin e qytetit të Vlorës me këngën “Hartimi dhe dëbora” të kompozuar nga shoqja e saj e klasës, Laureta uku.

Viti 1985, me të njëjtën këngë “Hartimi dhe dëbora”, Anita Bitri ka fituar vendin e parë në festivalin e interpretuesve të rinj në Shqipëri. Kjo këngë dhe interpretimi i Anitës u pëlqye aq shumë nga publiku, saqë kompozitori i mirënjohur Gjergj Leka e orkestroi këngën dhe e vendosi në festivalin e radios ku pati një sukses të jashtëzakonshëm. Po atë vit Anita do të mahniste spektatorin vlonjat që kishte mbushur sallën e Kinoteatrit “Petro Marko” me interpretimin e këngës “Një zog troket” të kompozitorit Artur Dhamo. Prill 1986, Anita fiton çmimin e parë në Festivalin e Interpretuesve në Vlorë me këngën "Ti je mësuese, je dhe shoqe" të kompozitorit Arben Zhezha. Maj 1986. Anita prezanton qytetin e Vlorës në “Festivalin e Interpretuesve të Klasës Punëtore” në Elbasan. Në këtë festival me ndihmën e publikut të mrekullueshëm elbasanas, u vlerësua me Çmim Nderi me këngën “Eja” të kompozitorit Osman Mula. 9 Qershor 1986, Në Festivalin e talenteve të reja me këngën “Ndjenjë“ të kompozitorit vlonjat Arben Zhezha, Anita do të fitonte çmimin e parë. Dhjetor 1986. Me këngën e kompozitorit Arben Zhezha, “Mos më harro mua”. Anita fiton përsëri çmimin e parë në “Festivalin e Këngës” që  organizohet në Vlorë, ku ishte mes të rriturve në moshë dhe në mes të rriturve në këngë. Në festivalin e “Zërave të rinj“, Anita paraqitet me një duet me këngëtarin Gëzim Çela, me Këngën "Buzëqeshja jote jemi ne", Muzika David Tukiçi, teksti Alqi Boshnjaku. Zëri i mrekullueshëm i Anitës elektrizoi sallën dhe mahniti jurinë e këtij festivali dhe vlerësohet me çmim nderi.

7 qershor 1987, Anita pranohet si këngëtare profesioniste pranë Trupës së Estradës “Petro Marko” të qytetit të Vlorës. Ishte vetëm 18 vjeç. Kjo trupë artistike, e kombinuar me humorin e çmuar të parodistëve dhe këngëtareve të njohura tashmë në rang vendi, e mbajti për disa vite me radhë Anita Bitrin në gjirin e saj, por shkëlqimi i saj para publikut vlonjat e më gjerë nisi të tërhiqte tashmë vëmendjen edhe të institucioneve të kryeqytetit. Menjëherë i bëhet ftesë në qershor të vitit 1987, që të merrte pjesë në një garë kombëtare në “Festivalin e Interpretueseve të Këngës” në Tiranë dhe në anketën muzikore të Radio Tiranës vlerësohet për interpretimin e saj brilant dhe fiton Çmim Nderi. Në dhjetor të vitit 1987, i bëhet ftesë për të marrë pjesë në “Festivalin e Këngës” në RTSH, ku edhe kësaj here kënga “E vogla mes shoqesh” e kompozitorit David Tukiçi, teksti Gjokё Beci do t’i sjellë një tjetër çmim të rëndësishëm. Pjekuria artistike e Anitës, do të sillte edhe suksesin e këngës së saj.

Në vitet që vijojnë debuton krahas këngëtarëve të famshëm të muzikës shqiptare. Ishin shumë të shpeshta koncertet e festivalet, ku Anita Bitri merrte pjesë në atë periudhë. Ishte viti i aktiviteteve të mëdha, viti i çmimeve dhe i vlerësimeve superiore. Tani Anita radhitej në një ndër zërat më të bukur të muzikës së lehtë shqiptare, dhe këto suksese do ta popullarizonin shumë.

• 1987-1988, fituese dy herë në Anketat Muzikore, me këngët e kompozuara nga A. Xhunga dhe Th. Çaçi.
• Viti 1988 do të fillonte me koncertin e saj të parë recital në sallën e Teatrit “Petro Marko” të qytetit të Vlorës. Në këtë koncert recital ishin të ftuar dhe 4 parodistët vlonjatë. Të 14 këngët e interpretuara nga Anita Bitri do të shoqëroheshin me ovacione e duartrokitje të forta nga publiku vlonjat që e adhuronte këngëtaren e tyre. Ky ishte i pari koncert recital në shkallë kombëtare. E para herë në Shqipëri që një këngëtare e vetme të zhvillonte një koncert recital.
• Në Koncertin e Pranverës 1988, në bashkëpunim me Alqi Boshnjakun dhe Aleksandër Vezulin, do të vinte në skenë kënga “Mos u nxito, mos u gabo”, e cila nuk ishte më një këngë që i dha çmimin e parë Anitës, por një perlë për muzikën e lehtë shqiptare.
• Dhjetor 1988, në “Festivalin e Këngës” Anita u prezantua me këngën “Fotografia”, e kompozuar nga David Tukiçi, e shoqëruar nga këngëtarët Gëzim Çela dhe sopranoja Lindita Lole Mezini.
• Mars 1989, me këngën “Dashuria s`njeh sekret” tё kompozitorit flamur Shehu, Anita do të rrëmbente çmimin e dytë të festivalit.
• Në “Koncerti e Pranverës” tё vitit 1989, Anita Bitri shpërthen me këngën "Lulet e majit i çel në janar", muzika: Vladimir Kotani, teksti: Arben Duka, shoqëruar nga kompleksi i Pallatit të Kulturës, një nga perlat e repertorit të saj.
• Tre muaj më pas ajo fiton çmimin e dytë në Koncertin e Këngës me këngën "Era përcjell fjalën të dua" të kompozitorit Gjergj Leka.
• Ndërrimi i viteve shpalos një tjetër sukses me duetin Bitri-Ndoci, “Shikomë në sy”.

Kokat e muzikës së lehtë shqiptare, Flamur Shehu dhe Jorgo Papingji, nuhasin te vajza vlonjate madhështinë e interpretimit skenik dhe i besojnë asaj këngën e tyre ”Askush s`do ta Besoj” për të marrë pjesë në Festivalin e 29-të të Këngës në RTSH, në dhjetor të vitit 1990. Anita vlerësohet me çmimin e parë. 

Dhjetor 1990 – Mars 1991, me këngën “Mësuesja ime e parë“, e kompozitorit Thanas Çaçi, Anita do të zinte vendin e parë si këngëtarja më e mirë në radio Tirana. Dhe kjo këngë do të ishte hit i asaj periudhe.

Pranverë 1991, në “Koncertin e Pranverës” përsëri bashkëpunimi Bitri-Shehu-Papingji, sjell në skenë këngën “S’ka formulë në dashuri”, ku Anita përsëri do të nderohej me çmimin e parë.

Po atë vit, Anita u prit me shumë duartrokitje nga spektatori vlonjat në interpretimin e tri këngëve me Ansamblin “Labëria”, në koncertin që u zhvillua në Kinoteatrin “Petro Marko” të Vlorës.

Dhjetor 1991, në Festivalin e 30-të në RTSH Anita do të sillte këngën “Fat dhe jetë” e njohur nga publiku “Filxhani i Kafesë”, muzika: Flamur Shehu, teksti: Jorgo Papingji. Këngë që do ta etikonte këngëtaren vlonjate. Koncerti i Pranverës 1992, përsëri do të sillte në skenë trinomin Bitri-Shehu-Papingji. Kësaj radhe kënga i ishte kushtuar një pjese të jetës së Anitës. Po atë vit, Anita Bitri, merr pjesë në konkursin e vendeve ballkanike në Eksishehir të Turqisë. Anita korri një sukses të jashtëzakonshëm dhe u prit shumë ngrohtë nga publiku turk. Koncerti u zhvillua në stadium dhe Anita Bitri evidentoi vlerat e folklorit shqiptar. Një sukses i jashtëzakonshëm.

Fillimi i vitit 1993 solli një tjetër debutim tepër të rëndësishëm të Anitës. Me një sukses të jashtëzakonshëm, u zhvillua koncerti i saj recital, i titulluar “Anita”. Ajo, me madhështi për dy ditë me radhë, elektrizoi 4000 spektatorët që mbushnin sallën e Pallatit të Sportit “Flamurtari” të qytetit Vlorës. Në këtë koncert Anita këndoi live të gjitha këngët e shoqëruar nga Orkestra e Estradës së Vlorës, shoqëruese kompleksi ishte këngëtarja Aurela Gaçe.Të ftuar nё kёtё koncert ishin edhe parodistët e Vlorës. Në Festivalin e 32-të të Këngës në RTSH, dhjetor 1993, me këngën “Dashuri ke emrin tim”, të kompozitorit vlonjat Artur Dhamo dhe orkestracion të Alfred Kaçinarit. Anita do të fitonte Çmim Nderi.

Viti 1994. Anita debutoi me shumë sukses në skenat europiane, si në Zvicër, Gjermani, Itali dhe Francë. Gjatë këtij viti ajo dha shume koncerte për shqiptarët e emigruar në Evropë, ku ajo interpretoi jo vetëm këngë të lehta dhe popullore të muzikës shqiptare por edhe ato botërore. Në këto aktivitete, ajo është ndjekur dhe admiruar jo vetëm nga emigrantët shqiptarë por edhe nga spektatori i huaj.

Viti 1995, do të sillte një tjetër sukses të rëndësishëm në jetën artistike te Anitës. Përsëri në Vlorë Anita dha një tjetër koncert të saj recital “Anita”. Ajo këndoi përsëri live para spektatorit vlonjat, i cili e duartrokiti dhe e admiroi pa masë këngëtaren e madhërishme. Të ftuar në këtë koncert, ishte e mrekullueshmja Silvana Braçe dhe komiku Met Bega, si dhe çiftet e baletit të ardhur nga kryeqyteti. Pas këtij suksesi të jashtëzakonshëm në qytetin e saj të Vlorës, Anita dha dhe shumë koncerte recitale në shumë qytete të Shqipërisë, duke e rritur pa masë famën e kësaj këngëtareje të madhe shqiptare. Koncertet recitale të Anitës, të shoqëruara nga parodistët dhe Trupa e

Estradës së Vlorës, kanë qenë një nga evenimentet shumë të rëndësishme të jetës së saj artistike në të gjithë territorin e Shqipërisë gjatë kësaj periudhe. Dhjetori i vitit 1995 e risjell përsëri Anitën në Festivalin e RTSH-së, me këngën "Besoj në Dashuri", një bashkëpunim tjetër me kompozitorin vlonjat Artur Dhamo, orkestruar nga Shpëtim Saraçi, por këtë rrallë ajo debuton jo si konkurruese por si e ftuara e nderit e këtij Festivali.

Vazhdimësia e koncerteve recitale “Anita” do të kapte dhe kufijtë e Veriut. Anita këndoi live të gjitha këngët gjatë koncertit 2-ditor mbajtur në Tropojë. Publiku tropojan e priti me madhështi dhe me shumë ngrohtësi këngëtaren e adhuruar. E ftuar në këtë koncert ishte edhe këngëtarja tropojane Fatmira Breçani. Aty Anitës i bëhet ftesë për të shkuar me një grup popullor të Tropojës në SHBA. E detyruar nga kushtet e vështira që po kalonte vendi ynë dhe nga kriza e madhe që përfshiu botën muzikore shqiptare në atë periudhë, Anita pranon ofertën dhe në vitin 1996, ajo u nis drejtë tokës së premtuar.

Të gjitha sukseset e krijimtarisë së saj muzikore, të arritura në këtë periudhë i dedikohen talentit të saj të padiskutueshëm, mënyra se si e interpretonte dhe trajtonte këngën, aftësia e saj e jashtëzakonshme kapte momentet më kulmore të një kënge dhe talenti i saj i lindur të përcillte ndjenjat dhe emocionet e këngës te spektatori. Në vitet që Anita doli në skenën e Këngës Shqiptare, vendi ynë ishte nën diktaturën komuniste, ku arti dhe muzika shqiptare ishte e kontrolluar nga censura komuniste. Por Anita me shumë bindje dhe ide shumë të përparuara për kohën që jetonim, u bë shpresa e aspiratave të gjithë rinisë, të çlironin muzikën tonë të bukur shqiptare nga ideologjizmat që e mbanin ende këtë art brenda kornizave të tyre censuruese. Anita me temperamentin e saj energjik, me potencën e bukur interpretuese dhe me stilin modern në skenë, udhëhoqi gjithë plejadën e këngëtarëve të viteve 90-të, drejt një arti muzikor më të moderuar. Anita theu paragjykimet dhe solli një frymë të re në muzikën e lehtë shqiptare.

Është për t’u theksuar se prej vitit 1987, deri më 1992-shin, Anita kontribuoi si këngëtare profesioniste pranë trupës së Estradës “Petro Marko” në Vlorë. Gjatë gjithë kësaj periudhe ajo mori pjesë në të gjitha evenimentet artistike të qytetit të saj të dashur. Anita dhe kënga e saj, solli një freski dhe vrull rinor në jetën artistike të këtij qyteti. Anita Bitri ishte “ambasadorja” e këngës dhe këngëtarëve vlonjatë në skenat më prestigjioze të asaj kohe. Në aktivitetet artistike të Anitës në këto vite 1988-1995, nuk duhen lënë pa përmendur dhe Koncertet e Verës, që zhvilloheshin nga Ministria e Kulturës, ku ajo ishte pjesëmarrëse e rregullt. Këto koncerte janë shfaqur gati në të gjithë Shqipërinë. Të ftuar specialë kanë qenë edhe çiftet e Ansamblit të Shtetit, të shoqëruar nga Orkestra e Estradës së Vlorës.

Krahas këngës, Anita nuk la pas dore dhe studimet, ishte vullneti dhe dëshira e saj që bën të mundur vazhdimin e studimeve të shkollës së lartë në Institutin e Lartë Pedagogjik “Aleksandër Xhuvani” në Elbasan, ku në vitin 1989 diplomohet si mësuese kantoje. Profesionin e mësueses ajo e ushtroi vetëm për pak muaj, pasi ajo që e thërriste ishte kënga. Zoti i kishte caktuar një mision, të lumturonte popullin e vet me zërin e saj magjik.

Në Amerikë

Gjatë qëndrimit në Amerikë aktiviteti artistik i Anitës ka qenë i pandalshëm dhe gjithnjë në rritje. Ajo ishte një model i përkryer i interpretimit dinjitoz të muzikës sonë të bukur shqiptare dhe ka ndihmuar shumë në rritjen e prestigjit të artit shqiptar në botë. Anita ka marrë pjesë gjallërisht dhe ka qenë në qendër të gjithë problemeve dhe jetës kulturore dhe artistike të diasporës. Ajo ishte e pranishme me zërin dhe interpretimin e saj në të gjitha koncertet, festivalet, aktivitetet artistike, koncertet e bamirësisë, koncertet e Vitit të Ri, festat e nënës, përvjetorët e ndryshme, dhe në shumë gëzime familjare të komunitetit shqiptar, në shumë shtete të Amerikës. Anita ishte jo vetëm një artiste e talentuar, por gjithashtu dhe një patriote e flaktë. Ajo ka dhënë kontributin e saj si artiste në shumë evenimente të ndryshme në përkujtim të festave nacionale të organizuara nga misioni shqiptar pranë 0KB-së, si Festat e Flamurit, ajo e Çlirimit, por dhe në ato të organizuara nga shoqatat e organizatat joqeveritare, në koncertet e bamirësisë dhe aktivitete të ndryshme, në të cilat janë mbledhur ndihma për Kosovën, në ndihmë të Universitetit të Shkupit, në ato të UNICEF-it, etj…

Në këtë kontekst është për t’u theksuar Koncerti i Bamirësisë që u zhvillua më 10 prill 2000 për mbledhjen e ndihmave për fëmijët e varfër të Shqipërisë. Për këtë koncert Anita meritoi lavdërimet dhe respektin e Presidentit të Shqipërisë, Zotit Mejdani për kontributin e dhënë, dhe gjatë interpretimit të disa këngëve u shoqërua nga vetë gruaja e Presidentit. Ajo ishte njëkohësisht dhe një anëtare aktive e Organizatës së Gruas Shqiptare në Amerikë, AANO’s. Dhe ka marrë pjesë në shumë koncerte dhe aktivitete artistike që kjo organizatë ka zhvilluar. Anita Bitri, talentin dhe zërin e mrekullueshëm ia dedikoi tërësisht çështjes shqiptare dhe ka kontribuar me gjithë zemër për të ndihmuar në rritjen e figurës së kombit shqiptar në botë.

Në nivelin artistik është për t’u vlerësuar se gjatë karrierës së saj të suksesshme në Amerikë, Anita bëri të mundur një gërshetim të përsosur të muzikës popullore me atë të lehtë shqiptare, duke ju përshtatur me një stil të ri dhe të larmishëm komunikimit me publikun shqiptar të diasporës. Pavarësisht se Anita ishte e prirur më shumë për të interpretuar muzikë të lehtë, ajo interpretoi me shumë dashuri e ngrohtësi edhe muzikë popullore nga treva të ndryshme të Shqipërisë, çka e vendos Anitën në një vend të nderuar e dinjitoz përkrah emrave më të shquar të muzikës kombëtare shqiptare. Këngët popullore të interpretuara nga Anita shquhen për origjinalitetin e interpretimit si dhe për përshtatjen me karakteret e veçanta të trevave të ndryshme muzikore, duke i pasuruar ato me vlera të reja e mjaft tërheqëse.

Gjithashtu Anita Bitri ka një meritë të veçantë në gërshetimin e muzikës sonë të lehtë shqiptare me Pop-in amerikan. Si një natyrë plot jetë ajo kërkonte disa nota më të forta, një muzikë që të kishte më shumë gjallëri. Eksperienca e gjatë e krijuar në vite si dhe pjekuria artistike, të gërshetuara edhe me talentin e saj si krijuese, bëri që Anita të hapte një rrugë të re dhe të pashkelur më parë në muzikën moderne shqiptare. Anita po punonte në gërshetimin e dy rrymave muzikore, muzikës shqiptare dhe atë amerikane. Ajo po punonte ta çonte muzikën tonë të bukur përpara artdashësit amerikan.

Për ta ilustruar aktivitetin e saj artistik të kësaj periudhe po japim disa fakte:

• Nëntori i vitit 1997, do të sjellë një koncert të bukur artistik, festimin e 10–Vjetorit të krijimit të grupit muzikor “Fisnikët”, drejtuar nga këngëtari i njohur i komunitetit, Haxhi Maqellara. Anita do të shpaloste bukurinë e këngës shqiptare së bashku me shumë këngëtarë të tjerë të diasporës.
• Shkurt 1998. Anita debuton në shumë koncerte humanitare të organizuara nga Dega e Lidhjes Demokratike të Kosovës, për të ndihmuar materialisht familjet në gjendje të vështirë ekonomike të shqiptarëve të Kosovës.
• Në 9 Maj 1998, në ditën e festës së Nënave, të organizuar nga AANO’s, Anita kontribuoi me interpretimin brilant dhe zërin e saj të mrekullueshëm. Pjesëmarrësit e këtij evenimenti këndonin së bashku me Anitën dhe nëpërmjet këngëve të bukura shqiptare kujtonin atdheun e tyre të dashur.
• 31 Dhjetor 1998, Anita do të merrte pjesë me shumë këngëtarë të tjerë të komunitetit, në mbrëmjen festive të Vitit të Ri. Organizuar në restorantin “Galleto”, New Jersey.

Fillimi i vitit 1999 solli daljen e albumit të parë me këngë “Malli”. Anita paraqitet para publikut me këngë të reja si dhe këngë të repertorit të saj, por në një stil më modern. Ky album ishte një bashkëpunim profesional me muzikantin e njohur, kitaristin e kompozitorin Edmond Xhani, njëkohësisht mik e koleg i afërt i Anitës. Materialet muzikore u punuan me kujdes dhe nivel artistik, ku spikat në mënyrë të veçantë kënga "Malli" (këngë nga e cila mori emrin ky album). Teksti i kësaj kënge ishte një krijim poetik i Anitës, ndërsa muzika e orkestracioni nga Edmond Xhani. Gjithashtu, vlerat e këtij albumi shtohen edhe nga këngët e tjera të interpretuara me dashuri, nivel të lartë interpretimi, pasion dhe energji (karakteristika këto të spikatura të Anitës) si: "Dashuria e parë", "Mos u nxito mos u gabo", "Ja ja ti vjen", etj. Albumi u realizuar nga shtëpia diskografike “Electric Planet Sound”, në Nju Jork. Promovimi i këtij albumi u bë në mjediset e Misionit Shqiptar në Kombet e Bashkuara po në Nju Jork.

30 janar 1999, Anita do të debutonte në koncertin humanitar të organizuar nga diaspora, për të ndihmuar materialisht familjet e masakruara nga policia serbe, në Recak të Kosovës. 14 mars 1999, Anita dhe shumë këngëtarë të tjerë të komunitetit do të merrte pjesë në spektaklin “Miss Albania `99”, që u zhvillua me një suksese tё jashtëzakonshëm nё New Jersey.

5 prilli i vitit 1999, solli dhe daljen në skenat e Brodoway të Anitës, në koncertin e organizuar nga një prej organizatave më të njohura në SHBA, “Madre”. Në këtë koncert paraqitja e Anitёs si artiste ishte e dyanshme, pasi për herë të parë ajo do të prezantohej jo vetëm si këngëtare por edhe si violiniste. Anita pati rastin dhe nderin të njihet me disa nga yjet e Hollivudit si Tom Robinns, Susan Sarandow, Vanesa Redgrave, Danny Schechter, Eve Essler, Nenad Bach etj, ku gjatë përshtypjeve që ata dhanë për Anitën, e përshkruan atё si një element shumë të denjë në artin muzikor dhe i uruan asaj mirëseardhjen në botën amerikane.

8 Mars 1999, nё koncertin qё u zhvillua nё New York, nga organizata “Motrat Qirjazi” pёr Ditёn e Nёnёs, Anita do ta bёnte kёtё ditё mё tё bukur me debutimin e saj brilant, pёr tё gjithё pjesëmarrësit e atij koncerti festiv.

12 gusht 1999, Anita shpalosi vlerat e jashtëzakonshme të muzikës së bukur popullore dhe moderne shqiptare para të gjithë ambasadorëve të botës, në mbrëmjen e organizuar nga Misioni Shqiptar në Kombet e Bashkuara, për nder të Ambasadorit, zotit Peter Burleigh. Të gjithë ambasadorët e botës patën rastin të dëgjojnë dhe të vlerësojnë muzikën tonë të mrekullueshme. Falënderimi i ambasadorit Burleigh në letrën drejtuar ambasadorit tonë, zotit Agim Nesho, ishte një vlerësim i madh për Anitën. Dhjetori i vitit 1999, solli për Anitën fitimin e konkursit të zhvilluar nga kompania amerikane C.P.V. për të kënduar dy këngë në programet e tyre televizive, që u transmetuan të përkthyera në shqip.

Ndërrimi i viteve do të sjellë një debutim të suksesshëm të Anitës në koncertin për festimin e natës së Vitit të Ri 2000, ku Anita me këngëtarë të tjerë të dëgjuar të komunitetit do të krijonte një atmosferë festive për bashkatdhetarët e saj të dashur shqiptarë.

Më 10 prill 2000, u zhvillua koncerti i bamirësisë, për mbledhjen e ndihmave për fëmijët e varfër të Shqipërisë. Në këtë koncert, Anita meritoi lavdërimet dhe respektin e Presidentit të Shqipërisë, Zotit Meidani.

Vera e vitit 2000, do tё ishte e shoqëruar me koncertet recitale të Anitës në bashkëpunim me aktorin dhe regjisorin e njohur Koço Devole, këngëtarin Eduart Barjami, vëllezërit Zena dhe shoqëruar nga grupi muzikor “Alba”. Koncerte që u zhvilluan në shumë shtete të Amerikës. Në këto shfaqje ishin të pranishëm qindra artdashës shqiptar dhe të huaj. Anita në këto koncerte, me zërin e saj magjik dhe me lojën e bukur me violinë bashkonte zemrat e shqiptarëve të diasporës. Në një nga këto koncerte, në Çikago, me dëshirën e tij vjen prej së largu edhe një nga personalitet më të shquara të diasporës, zoti Anthony Athanas, i cili e vlerësoi shumë muzikën tonë të bukur.

24 Shtator 2000, shënoi edhe pjesëmarrjen e Anitës në një nga koncertet më të shënuara të komunitetit të përbashkët shqiptaro-amerikan, 9-Vjetorin e gazetës “Illyria”. Anita Bitri e bëri më tërheqës këtë koncert, duke kombinuar zërin e saj magjik me lojën me violinë. Një moment prekës ishte interpretimi me violinë i potpurisë arbëreshe nga ana e Anitës dhe lotët e arbëreshit të ftuar nga Italia, zotit Antonio Bellusci. 12 Nëntori 2000, sjell Koncertin e madh në Nju Jork me shumë këngëtarë dhe artistë të njohur shqiptarë, ku vlen për t’u përmendur, Inva Mula, artiste me famë botërore, Piro Çako, Silvana Braçe, Pali dhe Zerina Kuke etj, organizuar nga fotografi me famë botërore, Fadil Berisha. E veçanta e Anitës në këtë koncert ishte prezantimi i saj live si këngëtare dhe violiniste. Përshtypjet dhe suksesi i Anitës në këtë koncert ishte i padiskutueshëm.

10 Dhjetor 2000. 1800 spektatorë dhe artdashës morën pjesë në Festivalin e 10-të  Artistik të Këngës e Valles Shqiptare në Amerikë, organizuar nga Qendra “Nënë Tereza” e Kishës Katolike “Zoja Shkodërs”, në sallën “Lehman College” në Nju Jork. Festival që organizohet çdo vit dhe, është manifestimi më i madh kulturor i botës shqiptare nё diasporë, ku debutojnë të gjithë këngëtarët dhe artistët e folklorit të komunitetit shqiptar. Anita do tё mahniste publikun e këtij festivali me zërin e saj të mrekullueshëm, si dhe me lojën me violinë.

Ndërrimi i viteve do të sjellë një debutim të suksesshëm të Anitës në shfaqjen që u dha në Astoria, Queens, NY, për festimin e natës së Vitit të Ri 2001. Ku Anita së bashku me këngëtarë të tjerë të komunitetit dhanë një koncert tё bukur për bashkatdhetarët shqiptarë në Nju Jork.

Viti 2001 filloi me një tjetër sukses në jetën artistike të Anitës. Ajo ftohet nga Organizata e Gruas në Amerikë, AANO`s, të marrë pjesë në koncertin, “Music Beyond Borders”, zhvilluar në Cami Hall në New York. Një koncert humanitar për gratë dhe fëmijët e varfër të Shqipërisë, Kosovës dhe Afganistan. Në këtë koncert ishin te ftuar Anita dhe dy këngëtare të dëgjuara në Amerikë, Sylvia Tosun dhe Tina Shafer. Vokali dhe performanca e Anitës e ngriti peshë publikun e sallës. Gjithashtu në këtë koncert, Anita u prezantua me Tina Shaffer, e cila e vlerësoi zërin e Anitës si “një zë engjëllor që zbret nga qielli”. Tina Shaffer, pop singer dhe song writer amerikane, ka bërë shumë hite për këngëtaret si:- Celine Dion, Donna Summer, Bette Midler etj. 28 Nëntori 2001, Miçigan. Në koncertin për Festën e Flamurit dhe Ditën e Pavarësisë Anita do të elektrizonte sallën e mbushur me atdhetarët shqiptarë të Miçiganit dhe të rrethinave të saj.

Ndërrimi i viteve do të sjellë një koncert të suksesshëm të Anitës në shfaqjen që u dha për festimin e natës së Vitit të Ri 2002, ku Anita me një performancë tё shkëlqyer e bëri kёtё mbrëmje mё tё bukur dhe mё festive për shqiptarët e Nju Jork-ut. Viti 2002 ishte një vit pune intensive për Anitën. Artistja shqiptare nuk ndalet. Studionte, kompozonte, shkruante poezi dhe punonte të rriste potencialin e saj si këngëtare. Me orë të tëra ajo këndonte dhe kompozonte këngë në pianon e saj. Ajo po punonte dhe po hapte një rrugë të re në artin e Diasporës Shqiptare. Ajo po bënte gërshetimin e muzikës sonë të bukur shqiptare me Pop-in amerikan.

Tetor 31, 2001. Në festën që u dha për Holloween në Nju Jork, Anita do të shpërblej me duartrokitjet e zjarrta të artdashësit shqiptar për debutimin e saj brilant. 28 Nëntori 2002. Në koncertin për Festën e flamurit dhe Ditën e Pavarësisë në Detroit, Anita do të elektrizonte sallën e mbushur me atdhetarët shqiptarë të Detroitit. Ndërrimi i viteve do të sjellë një debutim të suksesshëm të Anitës në shfaqjen që u dha në Boston për festimin e natës së Vitit të Ri. Ku Anita së bashku me grupin artistik “Alba” dhe me këngëtarë të tjerë të komunitetit dhanë një shfaqje dinjitoze dhe me nivel të lartë artistik për bashkatdhetarët shqiptarë në Boston.

24 janari 2003, nisi me pjesëmarrjen e Anitës në një nga koncertet më të mëdha të komunitetit shqiptar. Ajo prezantoi muzikën e lehtë shqiptare përkrah këngëtarëve kosovarë dhe maqedonas. Të ftuar nderi ishin ambasadori William Walker dhe drejtori i projektit të Evropës Lindore në CSIS, zoti Janusz Bugajski. Shkurti i vitit 2003 do të vendoste dhe kontratën me një kompani amerikane “An’Km records@Enterteiment” për realizimin e një albumi amerikan. 23 Mars 2003. Koncerti madhështor së bashku me grupin “Alba” do të ndiqet me shumë interes nga shumë artdashës shqiptarë. Publiku që mbushte sallën e këtij koncerti do ta shoqëronte dhe duartrokiste Anitën në të gjitha këngët e saj. Prill 2003, Nё koncertin humanitar për tё ndihmuar fёmijёt jetimë tё fshatit Velika Krusa, nё Kosovё, tё cilёt humbёn prindёrit pas raprezaljes sё ushtrisё serbe, Anita me debutimin e saj tё bukur kontribuoi qё tё mblidheshin mbi 10,000 dollarё donacion pёr kёta fёmijё jetimë.

Gusht 2003, Anita merr pjesë dhe i dha një atmosferë të gëzueshme me zërin dhe këngët e saj, koncertit që u zhvillua për përvjetorin e 57-të të Organizatës së Gruas në Amerikë, AANO`s, një nga organizatat me aktive ne atë kohë për shqiptarët e Amerikës dhe të Kanadasë.

31 Gusht, 2003. Anita sё bashku me grupin “Alba”, do të performonte me sukses në një koncert të bukur në Albany, up state NY. Koncert që u ndoq me shumë interesim nga artdashësit.

28 Nëntor 2003. Në koncertin për Festën e Flamurit dhe Ditën e Pavarësisë, Anita e shoqëruar nga orkestra “Alba” do të shfaqnin dhe njëherë vlerat dhe traditat e kombit tonë të dashur.

30 Nёntor 2003. Anita ishte e ftuar në një nga evenimentet artistike në Dallas, Texas, ku në këtë koncert këndoi dhe luajti me violinë.

Vitet 2003-2004 ishin vite tepër të rëndësishme për rritjen artistike të Anitës. Ajo nisi të kërkonte më shumë nga vetja në aspektin profesional. Gjatë kësaj periudhe ajo shpalosi vlerat e artit dhe të muzikës shqiptare në kufijtë e Amerikës. Anita realizoi dhe katër video-klipe të reja në bashkëpunim me studion “Albanian Kultur TV”, të Zotit Adem Belliu. Po ashtu dhe në bashkëpunim me regjisorin Xhevat Limani dhe me kameramanin Ilir Kasneci do të vinte para publikut shqiptar video-klipi shumë i bukur “Na jep bekimin”, një realizim shumë origjinal dhe i goditur. Në këtë kohë shënohet gjithashtu edhe fillimi i punës si kantautore e albumit “Çdo gjë është e mundur”. Në këtë album Anita shfaqet si një artiste e kompletuar, e sigurt dhe e vendosur për të shkelur në shtigje të reja në muzikën shqiptare. Anita po punonte në gërshetimin e dy rrymave muzikore, muzikës shqiptare dhe asaj amerikane. Në 9 Maj 2004, Anita së bashku me Grupin muzikor “Alba” të drejtuar nga i famshmi Edi Xhani, do të merrte pjesë në një nga koncertet e komunitetit të organizuar nga Organizata e Grave Shqiptaro-Amerikane “Motrat Qirjazi” me rastin e Ditës së Nënave në Brooklyn.

Qershori i vitit 2004, do të sjellë realizimin e vidio-klipit “Nostalgjia”. Teksti dhe muzika: Anita Bitri, orkestracioni: James Avatar, regjizore: Teressa Haefele, kameraman: Ilir Kasneci. Kjo këngë është krijuar dhe kompozuar nga vetë këngëtarja dhe i kushtohet nostalgjisë që Anita kishte për të shtrenjtën Shqipëri. Në këtë këngë dëshirat, ndjenjat, bota e saj e brendshme shpirtërore janë përcjellë me anë të tingujve të mrekullueshëm dhe tekstit plot kuptim.

24 Qershor 2004. Shënoi për Anitën realizimin e albumit të saj të dytë shumë të suksesshëm “Çdo gjë është e mundur”. Në këtë album Anita paraqitet si kantautore. E përse jo, ajo kishte një koncept të plotë për muzikën, të cilën ajo jo vetëm e ndiente, por edhe e zotëronte plotësisht. Ishte një gjeni në violinë, ndërsa solfezhin e njihte në përsosmëri. Gjithashtu Anita ishte shume e apasionuar në poezi, gjë e cila i dha mundësi të krijonte vetë të gjitha tekstet e këngëve të këtij albumi. Korrik 2004. Më në fund pas 9 vjetëve, Anitës ju realizua një nga dëshirat që mundonte shpirtin e saj, të shikonte dhe njëherë tokën mëmë. Të vinte dhe njëherë pranë publikut të dashur shqiptar dhe të çlironte nga zemra e saj atë ndjenjë malli dhe dhimbje që ajo ndiente larg publikut të mrekullueshëm shqiptar. Më në fund i jepet leja të udhëtonte jashtë kufijve të Amerikës.

Atë ditë që preku tokën e bekuar shqiptare, kur sapo zbriti në aeroportin “Nënë Tereza” në Rinas, Anita Bitri e kuptoi se askush nuk e kishte harruar. Publiku i dashur shqiptar e mirëpriti këngëtaren dhe artisten e madhe me ngrohtësi dhe respekt. Shtypi dhe mediat me shumë dashamirësi menjëherë i kushtuan artistes së famshme një vëmendje të jashtëzakonshme. Këtu vlen të përmendet konferenca e shtypit me të gjithë mediat dhe TV shqiptare, ku artistët dhe gazetarët shqiptar i uruan mirëseardhjen këngëtares së madhe shqiptare Anita Bitri. Po ashtu të gjithë stacionet televizive dhe të radiove rendën kush e kush më parë ta kishin Anitën në emisionet dhe në transmetimet e tyre. Ministri i Kulturës i Rinisё dhe Sportit së Shqipërisë Blendi Klosi, do ta përgëzonte personalisht Anitën për përfaqësimin dinjitoz të muzikës shqiptare në Amerikë. Udhëtimi në qytetin e saj të dashur Vlorë ato ditë të nxehta vere do të ishte një tjetër kujtim i bukur për Anitën. Vlora e priti me madhështi artisten e vet. Anita kishte nostalgji për emocionet, buzëqeshjet, duartrokitjet dhe ngrohtësinë që publiku i dashur vlonjat i dhuronte asaj sa herë ajo ngjitej në skenën vlonjate.

Anita ishte shumë e lumtur dhe kishte rilindur që ndodhej në Shqipërinë e saj tё dashur. Nuk ecte, por fluturonte. Zemra e saj ishte mbushur me dashuri dhe mirënjohje për këtë vend që ajo e donte aq shumë. Ishte si në ëndërr. Fytyra i rrezatonte dhe shpirti ishte qetësuar nga malli dhe dhimbja e 9 viteve largesë. 19 Tetor 2004. Nënë Tereza i caktoi misionin e ri, të këndonte përjetësisht për engjëjt kësaj ikone të muzikës shqiptare. Anita dhe familja Bitri do të iknin në gjumë aksidentalisht. Monoksidi i karbonit do të ndërpriste në mes ëndrrat dhe projektet e saj. Gjithë mediat amerikano-shqiptare dhe diaspora në Amerikë e pritën me hidhërim dhe dhimbje të madhe këtë humbje tragjike. Shqipëria dhe artdashësit shqiptarë në mbarё botën e qanë me dhimbje humbjen e parakohshme të Anita Bitrit.

Respekti për krijimtarinë e saj do të bënte që artistët shqiptarë të diasporës dhe të gjithë artdashësit e muzikës shqiptare, si kurrë ndonjëherë të bashkoheshin në një koncert lamtumire për përcjelljen e këngëtares së madhe shqiptare Anita Bitri në tokën e bekuar shqiptare. Në këtë koncert madhështor artistët dhe artdashësit e muzikës shqiptare i dhanë lamtumirën e fundit artistes së dashur dhe me kontributet e tyre bënë të mundur transportimin e tyre në tokën e bukur shqiptare. Shqipëria dhe Vlora e dashur e përcolli me lot dhe me dhimbje në banesën e fundit. Trupi i Anita Bitrit prehet në paqe në qytetin e saj të dashur Vlorë.

Shumë kompozitorë, këngëtarë, muzikantë dhe artistë shqiptarë e kanë vlerësuar vokalin, teknikën, talentin dhe interpretimin e Anitës, si nga më të talentuarit dhe profesionalë në fushën e këngës.

Gjatë karrierës së saj artistike, Anita është nderuar me shumë çmime nderi dhe diploma në aktivitete të ndryshme kombëtare e ndërkombëtare. Këto çmime të fituara tregojnë më së miri aftësitë e shquara në fushën e artit skenik dhe madhështinë e talentit të saj, gjithashtu respekti dhe vlerësimi i madh që i kanë bërë asaj juritë e ndryshme, kolegët e bashkëpunëtorët e saj dhe sidomos artdashësit e radhitin këtë këngëtare të mrekullueshme shqiptare në krye të epokës së artë të artistëve të shquar. Te këngëtarja Anita Bitri gjendet gjithçka që Zoti i ka dhuruar një artisti. Por të gjitha këto suksese në jetën artistike të Anitës nuk do të bëheshin të mundura pa përkrahjen dhe respektin që tregoi publiku i dashur shqiptar, të cilin ajo e adhuronte dhe i dhuronte çaste të gëzuara me zërin e saj magjik. Gjithashtu një rol të rëndësishëm dhe vendimtar në këtë drejtim luajti dhe lindja e vajzës sё saj, Siborës. Lindja e vajzës ishte një nga dhuratat më të mëdha, që Zoti i fali. Engjëllushen e vogël Anita e rrethoi me një dashuri dhe përkujdesje të papërshkrueshme. Ajo e edukonte me respektin për Shqipërinë dhe gjuhën shqipe, përkujdesej në mënyrë të veçantë për ecurinë e saj shkollore, ishte një nënë e përsosur dhe një edukatore e mirë.

Kënaqësinë Zoti ia shtoi me ardhjen e nënës në Amerikë, pasi Hazbija jo vetëm që ishte shumë e lidhur me Anitën, por njëkohësisht ishte një nxitje në jetën e saj artistike, duke flijuar çdo gjë me qëllim që t’i linte hapësirë krijimtarisë artistike të vajzës dhe këngëtares së saj të adhuruar. Anita ka qenë për të gjithë familjen Bitri, nderi dhe krenaria e kësaj familje. Me ikjen e Anita Bitrit arti dhe publiku shqiptar humbi një zë magjepsës dhe të mrekullueshëm. Shqipëria një patriote të flaktë. Diaspora një aktiviste dhe personalitet muzikor. Familja dhe miqtë, një artiste dhe shoqe të mrekullueshme.